पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
बर्दिया : केही महिना अघिदेखि जब्दीघाटमा पैसा तिरेर काठको पुल तर्न बाध्य स्थानीयले अहिले निःशुल्क पुल तर्न पाएका छन् । गुलरिया र बारबर्दिया नगरपालिका जोड्न बनाइएको काठको पुल सञ्चालनका लागि नगरपालिकाले लगानी गरेपछि सर्वसाधारणहरू निःशुल्क आवतजावत गर्न पाएका छन् ।
बारबर्दिया नगरपालिकाले नदीमा काठको पुल सञ्चालनका लागि रकम दिने सम्झौता गरेपछि सर्वसाधारण निःशुल्क पुल तर्न पाएका हुन् । माघ १५ गतेदेखि जेठ मसान्तसम्मको लागि नगरपालिकाले पुल सञ्चालन र मर्मत सम्हारका लागि ५ लाख दिने गरि सम्झौता गरेको छ । पहिले ठेकेदारसँग पैसा लिने गरि सम्झौता गरिएको थियो । अहिले पुल सञ्चालन गरेवापत ठेकेदारलाई नगरपालिकाले पैसा दिने गरि सम्झौता गरिएको बारबर्दिया नगरपालिकाका नगरप्रमुख छविलाल थारूले बताए । सर्वसाधारणलाई आवतजावत गर्न सहज होस् भनेर पुल निःशुल्क गराइएको उनले बताए ।
नदीको सतह कम भएपछि गत मंसिर देखि काठको पुल निर्माण गरिएको थियो । काठको पुल तर्नका लागि मानिसलाई १० रुपैयाँ, मानिस र साइकललाई २० रुपैयाँ मोटरसाइकल र मानिसको २५ रुपैयाँ, अटो रिक्साको ५० रुपैयाँ, हाँस र कुखुराको पाँच रुपैयाँ, खसी बाख्राको १५ रुपैयाँ र कृषकको मल बीउ र कृषजन्य उत्पादनको प्रतिक्विन्टल १० रुपैयाँ ठेकेदारले शुल्क लिने गरेको थियो । नगरपालिकाले गत साउन महिना देखि माघ १५ गते सम्म ६ महिनाको लागि नदी तार्न करिब १८ लाखको लिने गरी ठेक्का सम्झौता गरेको थियो ।
त्यसपछि माघ १५ सम्म सम्पूर्ण तयारी पुरा गरि नगरपालिकाले काठको पुल निःशुल्क बनाएको छ । काठको पुल तर्नको निःशुल्क बनाएपछि आवत जावत गर्न सहज भएको बारबर्दिया नगरपालिका वडा नं ८ का यसु केसीले बताए ।
जब्दीघाटमा निर्माण भएको पक्कीपुल हस्तान्तरण नहुँदै २०७४मा भासिएको थियो । २०७९ सालमा पुल पूर्णरुपमा क्षती भएपछि स्थानीहरू नदी तर्नका लागि सास्ती ब्यहोरीरहेका छन् । सरकारले अघिल्लो आर्थिक वर्ष देखि बजेट विनियोजन गरेपनि जब्दीघाटमा पुल निर्माणका लागि ठेक्का भएको छैन ।
चालु आर्थिक वर्षमा ११ करोड रकम विनियोजन भएपनि बहुबर्षे स्रोत सुनिश्चितता नभएको हुनाले ठेक्का प्रक्रियामा लैजान नसकिएको सडक डिभिजन कार्यालय नेपालगञ्जका प्रमुख नरेन्द्र भट्टले बताए । पुल निर्माणका लागि एक अर्ब एक करोड २९ लाख रकम लाग्ने अनुमान गरिएको छ ।
