पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
सल्यान : धेरै पढे लेखेका युवा युवतीहरू बेरोजगार भएर देश तथा विदेशमा भौँतारिरहेका हामी देख्न सक्छौँ । अभिभावकहरूले समेत धेरै पढेर डाक्टर, पाइलट, इन्जिनियर, अधिकृत बनेस् भनेर आषिश दिने गर्दछन् ।
पढेलेखेका युवा कुर्सीमा बसेर काम गर्न रुचाउँछन् तर स्वरोजगारमूलक काम गर्नबाट पछि हट्छन् । तर यसबिचमा यस्ता युवा पनि छन् जसले स्नातकोत्तरसम्म अध्ययन गरेर पनि मूर्ति बनाउने पेसालाई अङ्गालेर मनग्य आम्दानी गरी रहेका छन् ।
सल्यानको बागचौर नगरपालिका ९ मा जन्मिएका टोपेन्द्र डाँगीले मूर्ति बनाउने पेसालाई व्यावसायिक बनाएका छन् । दैनिक मूर्ति बनाउनमै व्यस्त रहने डाँगीले वार्षिक ३० लाख ४० लाख बढी आम्दानी गर्दै आइरहेका छन् । उनले भने पैसा कमाउन विदेश वा सरकारी जागिर नै खानुपर्छ भन्ने केही छैन । सबै व्यक्तिमा कुनै न कुनै सिप हुन्छ उक्त सिपलाई चिन्न र प्रयोग गर्न सक्नुपर्छ ।
स्नातकोत्तर गरेका उनको ७ वर्षको शिक्षण पेसाको अनुभव समेत छ । शिक्षण पेसामा चित्त नबुझेपछि मूर्ति बनाउने पेसामा लागे । गत वर्ष मात्र ४० लाख बराबरको कारोबार गरेका उनले यो वर्ष कारोबार बढ्ने बताए । पढी लेखी जागिर नै खानुपर्छ भन्ने आफ्नो मनमा भावना नआएको बताउँदै उनले आफूले गरेको काम प्रति सन्तुष्ट रहनु पर्ने बताऐ । हातमा सिप र कला भए आम्दानी गर्न कहीँ कतै जानु नपर्ने उनी बताउँछन् ।
एउटै मूर्तिको ५ लाखसम्म
मूर्तिकार डाँगीले निर्माण गरेको एउटै मूर्तिको मूल्य ५ लाखसम्म लिने गरेका छन् । सामान्यतया १० हजारदेखि ५ लाखसम्मको मूर्ति बिक्री गरेको उनको भनाई छ । मूर्तिको आकार प्रकार अनुसार रकम निर्धारण हुने डाँगी बताउँछन् ।
चाडपर्वमा देवीदेवताका मूर्ति बनाउन भ्याई नभ्याई हुने बताउँदै उनले अन्य समयमा खाली समय काट्नु नपरेको बताए । एउटा मूर्ति बनाउन एक हप्तादेखि एक महिनासम्म लाग्ने गरेको बताउँदै उनले प्रायजसो फिल्डमा नै गएर मूर्ति बनाउनु पर्ने भएकाले मूर्तिको मूल्य अलि बढी हुने गरेको बताए ।
चार जनालाई रोजगारी
स्वदेशमा रोजगारी नपाएको भन्दै धेरै युवा विदेश पलायन भइरहँदा डाँगीले भने चार जनालाई रोजगारी दिएका छन् । आफू स्वरोजगार हुनुका साथै चार जनालाई प्रत्यक्ष रोजगारी दिएको उनको भनाई छ । चार जनालाई मासिक तलबमा भन्दा पनि मूर्तिको साइज र मूल्य अनुसार दिने गरेको डाँगीले बताए ।
उनले भने एउटै कामदारले कामको प्रकृति हेरी ५० हजारसम्म रकम पाउने गरेका छन् । पेसा व्यवसाय सानो ठूलो नहुने बताउँदै उनले सामान्य खालको पेसा व्यवसायबाट पनि राम्रो आम्दानी लिन सकिने बताए ।
