गुलरियामा नेतृत्व विकास र पैरवीसम्बन्धी तालिम

बर्दिया : बालबालिका, किशोरकिशोरी तथा युवाहरूको नेतृत्व क्षमता, आत्मविश्वास, अभियान सञ्चालन तथा पैरवीसम्बन्धी सीप अभिवृद्धि गर्ने उद्देश्यले गुलरिया नगरपालिकामा दुईदिने नेतृत्व विकास, अभियान तथा पैरवीसम्बन्धी तालिम सम्पन्न भएको छ ।

प्लान इन्टरनेशनल नेपाल, बाँके युनेस्को क्लब तथा राधाकृष्ण थारु जनसेवा केन्द्रको साझेदारीमा सञ्चालित सुरक्षित भविष्य परियोजनाअन्तर्गत आयोजित उक्त तालिममा गुलरिया नगरपालिका तथा बढैयाताल गाउँपालिकाका गरी जम्मा २५ जना बालबालिका, किशोरकिशोरी तथा युवाहरूको सक्रिय सहभागिता रहेको थियो ।

तालिमको प्रारम्भमा सुरक्षित भविष्य परियोजनाका परियोजना संयोजक गोविन्द प्रसाद लामिछानेले कार्यक्रमको उद्देश्य, विषयवस्तु तथा बालबालिका र युवाहरूको नेतृत्व विकासमा यस्ता तालिमको महत्त्वबारे प्रकाश पार्दै सहभागीहरूलाई अभिमुखीकरण गरेका थिए ।

तालिमका क्रममा प्रभावकारी अभियान सञ्चालन तथा जनवकालत, नेतृत्व विकास र नेतृत्वदायी क्षमता, पैरवी तथा वकालत, बालबालिका तथा युवाहरूको अर्थपूर्ण सहभागिता, बालअधिकारका सवालहरू तथा नीतिगत तहमा आफ्ना आवाज र सरोकारहरू प्रभावकारी रूपमा प्रस्तुत गर्ने विषयमा व्यावहारिक छलफल तथा सहजीकरण गरिएको थियो ।

तालिमको सहजीकरण विनयदिल लामाले गरेका थिए भने कार्यक्रम सञ्चालन नग्मा सिद्दिकीले गरेकी थिइन् ।

तालिमले सहभागीहरूमा नेतृत्व क्षमता, आत्मविश्वास, प्रभावकारी सञ्चार तथा अभियान सञ्चालन र पैरवीसम्बन्धी सीप अभिवृद्धि गर्नुका साथै आफ्ना अधिकार, सवाल र सरोकारका विषयमा निर्भीकतापूर्वक आवाज उठाउन थप प्रेरित गर्ने विश्वास लिइएको बाँके युनेस्को क्लबका अध्यक्ष प्रवेज अलि सिद्दिकीले बताए । 

साथै, बालबालिका तथा युवाहरूलाई आफ्नो समुदायमा विद्यमान सामाजिक चुनौतीहरूको पहिचान, समाधानका लागि सामूहिक पहल तथा सकारात्मक परिवर्तनको नेतृत्व गर्न सक्षम बनाउने अपेक्षा गरिएको पनि उनले बताए ।

बालबालिका तथा युवाहरू केवल भविष्यका कर्णधार मात्र होइनन्, उनीहरू वर्तमानका सक्रिय परिवर्तनका संवाहक र समाज रूपान्तरणका महत्वपूर्ण साझेदार पनि हुन् । उनीहरूको विचार, आवाज, क्षमता र नेतृत्वलाई उचित स्थान तथा अवसर प्रदान गर्न सकेमा मात्रै समावेशी, सुरक्षित, न्यायपूर्ण र बालमैत्री समाज निर्माण सम्भव हुन्छ ।

प्लान इन्टरनेसनल नेपालका अनुसार आजको सशक्त आवाज नै भोलिको सक्षम नेतृत्व हो । अवसर पाए युवा नेतृत्व गर्छन्, विश्वास पाए परिवर्तन सम्भव बनाउँछन् । त्यसैले बालबालिका तथा युवाहरूको क्षमता विकास, अर्थपूर्ण सहभागिता र नेतृत्वलाई प्रवद्र्धन गर्नु भनेको समुन्नत, समावेशी र न्यायपूर्ण भविष्यको आधार निर्माण गर्नु हो ।