बाघको आक्रमणबाट बाँकेमा एक जनाको मृत्यु

नेपालगञ्ज : बाघले आक्रमण गर्दा बाँकेमा एकजनाको मृत्यु भएको छ । बाँकेको ढकेरीमा बाघको आक्रमणबाट एक पुरुषको ज्यान गएको हो ।

मृत्यु हुनेमा राप्ती सोनारी गाउँपालिका वडा नम्बर ९ ढकेरीस्थित गुरुवागाउ नमुना टोलका ४० बर्षिय इन्द्रबहादुर खत्री रहेका छन् ।

शुक्रबार अन्दाजी ९ बजेतिर रिम्ना समुदायक वन भित्र घाँस काट्न गएका खत्री साँझ ७ बजेसम्म पनि घर नफर्केपछि स्थानीयबासीले खोजी गरेका थिए । स्थानीयले खोजीका क्रममा राती ९ बजेतिर बाघले आक्रमण गरेको अवस्थामा खत्रीको शव फेला पारेका थिए ।

जंगली जनावरले पटक–पटक आक्रमण गर्दा पनि बाँके निकुञ्जले रोकथामका लागि कुनै पहल नगरेको स्थानीयहरुले आरोप लगाएका छन् ।