पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
बर्दिया : राजापुर नगरपालिका र गेरुवा गाउँपालिका करिब पाँच हजार किसानहरू गेरुवा गाउँपालिका–१, जनकनगरस्थित कर्णाली नदी थुनेर खेतमा पानी ल्याएका छन् ।
असारको पहिलो सातासम्म पनि पानी नपर्दा रोपाइका लागि स्थानीय स्रोत साधनको प्रयोग गरी श्रमदान गरेर नदी थुनेर पानी ल्याएका हुन् । ओखरिया इन्टेकबाट १० हजार हेक्टर क्षेत्रफलमा सिँचाइ हुने गर्दछ ।
खडेरीले गर्दा खेतमा पानी नपुगेपछि किसानहरू ट्याक्टरमा झाला पाता र काठ दाउरा लिएर नदीमा पुगेका थिए । इन्टेकनजिक रहेको कर्णालीको भङ्गालो स्थानीय स्रोत साधनले थुनेर ओखरिया इन्टेकतर्फ पानी ल्याएका छन् ।
धान रोप्ने सिजनमा हरेक वर्ष किसानले नदीमा अस्थायी बाँध बाँधेर खेतमा पानी पु¥याउने गरेका छन् । राजापुर सिँचाइ आयोजनाले निर्माण गरेको राजापुर सिँचाइ प्रणालीअन्तर्गतको संयुक्त बुढीकुलो सिँचाइ प्रणाली अन्तर्गत १२ वटा मौजा रहेका छन् ।
राजापुर सिँचाइ प्रणाली व्यवस्थितरूपमा निर्माण नहुँदा हरेक वर्ष जोखिम मोलेर किसानहरू नदीमा बाँध बाध्न जानुपर्ने बाध्यता रहेको छ । पानीको मुहानदेखि टाढा बुढिकुलाको इन्टेक रहेको हुँदा पानी बुढिकुलासम्म ल्याउन जानुपर्ने बाध्यता रहेको गोला जलउपभोक्ता संस्था अध्यक्ष धनबहादुर शाहीले बताए ।
अरू स्थानमा स्थायीरूपमा मुहान बने पनि पुरानो सिँचाइ प्रणालीमा स्थायी मुहान नहुँदा हरेक वर्ष जोखिम पुर्णरूपमा नदीमा पस्नु परेको बताए । 'राजापुर क्षेत्र अन्नको भण्डार भएपनि सिँचाइका लागि स्थायी मुहान नबनाउँदा किसानले दुःख पाएका छन् । नेपाल सरकारले स्थायी बाँध र संरचना बनाएर सिँचाइको व्यवस्थापन गर्नुपर्छ ।' उनले भने, 'सरकारले सात किलोमिटर स्थायी संरचना बनाएमा यो समस्या सँधैका लागि अन्त्य हुन्छ ।'
राजापुर र गेरुवावासी जब पानी चाहिन्छ तब अस्थायी बाँध बाध्नका लागि नदीमा पुग्ने गरेको किसान गुरुप्रसाद चौधरीले बताए । उनले लामो समयदेखि पानीको लागि श्रमदान गर्न बाध्य छौं, कहिलेसम्म गर्नुपर्ने हो थाहा छैन । खेती लगाउने समयमा पनि कुलामा पानी नहुँदा जोखिम मोल्न बाध्य भएको बताए । नहरमा पानीको मात्रा बढाउन परम्परागत रूपमा बेगारी (जनश्रमदान) गरिरहेको राजापुर सिँचाइ व्यवस्थापन कार्यालयका सूचना अधिकारी विक्रम राईले बताए ।
कर्णाली नदी फिँजिएको र ठुलो बजेट लगाएर व्यवस्थान नगर्दासम्म जनताले यसरी नै दुःख पाइराख्नु पर्ने उनले बताए । नदी धेरै भङ्गालोमा फैलिएको हुनाले एक ठाउँमा संरचना बनाएर नहुने बताउँदै ठुलो बजेट छुट्याएर व्यवस्थित मुहान बनाउनुपर्ने उनले बताए ।
